U studiente corsu Lisandru Plasenzotti hà pussutu, infine, è dopu à più di quattru mesi di prighjò, rientre in casa soia, vennari scorsu in Aiacciu. L’Aiaccinu, chì ghjera statu incarceratu, prima à i Baumettes in Marseglia, era vultatu à a prighjò d’Aiacciu di farraghju scorsu.
A so famiglia, sustenuta da a Liga di i diritti di l’omi è dinò amichi, associi o parsunità quì in Corsica, s’hè battuta dapoi u principiu di st’affare, dicendu sempre chè u so figliolu, ùn c’era per nulla ind’è stu cartulare. Purtendu, incù i so avucati, e prove di a so nucenza. Malgratu què, Lisandru, ch’avia ricusatu, di sittembre scorsu, di dà u so ADN (sarà forse per qu`è ch’ell’anu mess’in prighjò) hè statu in prighjò dapoi nuvembre scorsu. Avia ancu fattu una greva di a fame di 50 ghjorni. Si dicia, ind’è l’affare di l’arme truvate in Aiacciu chì c’era l’ADN di u studiente. Mà quì dinò, i respunsevuli di a ghjustizia incaricati di stu cartulare, ùn anu mai pussutu purtà e prove è truvà, in fine, l’ADN di Lisandru.
U ghjovanu hà sempre dumandatu d’esse ricivutu da u ghjudice Choquet mà quellu hà sempre fattu u mortu. In fine, ghjè una certa “pressione” chìo sbucca d’una manera logica nantu à a liberazione di Lisandru Plasenzotti a settimana passata. S’hè quantunque “manghjatu” quattru mesi è mezu di prighjò et stu tempu quì lacarà, di sicuru, qualcosa à u nivellu psicologicu. Pocu impreme, u ghjovanu ritrova i soi, è ripiglierà, pocu à pocu, à sovita di nanzu…ancu s’ell’hè custrettu d’andà una volta u mese, à a gendarmeria o s’ell’ùn po micca sorte di Francia. Si po pinsà chè st’affare ribomba d’una certa manera cum’è una vittoria….
Vous aimez cet article ? Faîtes-en profiter vos amis !
Faites passer l’information autours de vous en cliquant sur :
Comments are closed.