« So i corsi un populu particulari trà l’altri. E cum’é l’altri populi, so a tempu uniti è spartuti in gruppi suciali chi i so intaressi un so micca sempri i listessi, è ponu ancu essa cuntrarii.» Ghjuvan Maria ARRIGHI (« Corsica » n° 160 Ghjinnaghju 2013)
U gestu di u Cunsigliu Custituziunali Francesu di metta un termini à a pruragazzioni di l’arresti « Miot » ha pruvucatu in Corsica una zerga pupulari. Al di là di i strati suciali, ugni corsu si senti cuncirnatu. Di fatti a riazzioni sprimata traduci a leia ch’asisti tra u corsu e a so tarra.
In Portivecchju, a dimarchja di « U RIACQUISTU DI PORTIVECCHJU » prova d’adduniscia tutti l’aghjenti paisani, al di là di i so scelti parsunali pulitichi, pà metta in ballu un andatura cumuna. Com’ asisti dighjà issa intesa à u niveddu naziunali.
U cumunicatu isciutu pocu tempu fà hè chjaru : pidendu l’asempiu di u Culletivu pà a difesa di l’arresti « Miot », u RIACQUISTU DI PORTIVECCHJU pruponi l’urganisazzioni di un dibatittu apartu a tutti i forzi sani di u rughjonu, pà una riunioni pubblica d’infurmazzioni e di dibattitu. Saria tandu un foru induva ugnunu pudaria dà u so parè.
Al di là, si po pinsà chi, si ugnunu si riconosci in ‘ssa difesa cumuna, fendu privalé l’intaressi suprani di i corsi, a riusciuta e po dassi u successu populari sarani d’appuntamentu. E parmittarani di pettu a u Statu Francesu di fà valè i dritti di i corsi fra quali quiddu d’ammaistrà a so tarra.
Saria bè quantunqua di veda in Portivecchju una cunghjunzioni di tutti. Supratuttu chi annant’a difesa di i pruprietà di i corsi, si sentini sempri i listessi…
Andendu più luntanu ,a quistioni maiori chi si poni dighjà hé di rifletta nant’a l’urganizzazioni di un dispusitivu addatatu chi assicurighja un svillupu tarrituriali ammaistratu. Volli di chi ci vularia à custruiscia un Statutu fiscali appropriatu. U mantinimentu di l’arresti « Miot » entri in’ssu quadru cume si po cuncipi di tarriturializzà l’impositi.
Oghji semu dinò di pettu a una rialtà storica. A dicisioni di u Cunsigliu Custituzziunali Francesu s’iscrivi in i cuntradizioni chi upponini dapoi piu di dui seculi a pulitica di u Statu Francesu e u populu corsu chi brama sempri a so vulintà di campà in tarra soia. Se no pudemu tutti insembu metta in ballu un andatura pupulari esimplari, tandu riusciaremu tutti insembu a arritrà l’inghjusta pritinzioni francesa chi circa a spatrunì i corsi.
Oghji hè tempu di mossa. Mossa rughjunali, mossa naziunali !!!
Ulivieru SAULI ( U Riacquistu di Portivecchju)
Corsica Infurmazione: l’information de la Corse, des Réseaux sociaux et des Blogs politiques
Vous aimez cet article ? Faîtes-en profiter vos amis !
Faites passer l’information autours de vous en cliquant sur :
Comments are closed.