A a sessione d’aprile scorsu, u nostru gruppu chjamava , per via di una dumanda à bocca, à l’urganizazione d’assise di l’impiegu è di a furmazione. In quantu di cunsiglieru esecutivu in carica d’issu cartularu, ci avete rispostu di si. Eccu dunque chi st’assise s’aprianu in Aiacciu u 22 d’ottobre scorsu.
Avemu di sicuru accumpagnatu è ancu participatu à st’appertura. L’attori prisente sò stati numerosi è ognunu a postu monde quistione interessante . E ancu se n’aviamu dighjà cuscenza, ci simu avvistu ancu di più, ascultendu i prufeziunali, chi a prublematica era maio è cumplessa mà chi era dinu una primura maio.
Ma fattu si stà oghje chi, senza vulè rimette in causa, a vostra vulintà è u vostru ingaghjamentu nantu à issu sughjettu, avemu quantunque qualche interrugazione. Vale à dì chi, ci hè statu dettu chi st’assise si tenerianu sin’a u mese di ferraghju. Micca cume no a pinsavamu da u principiu, pè una prima cunsultazione, ma pè a restituzione definitiva. Allora incu tutta a bona vulintà chi ognunu ci puderà è ci vulerà mette ùn ci pare micca pussibule. Cumu si po fà un travagliu seriu et seguitatu nantu à l’impiegu è a furmazione in 3 mesi soli.
I dati è sciffri chi ci so stati cummunicati à l’occasione di l’appertura di st’assise, permettenu solu pè u mumentu un avvicinanza spizzata è micca l’analisa
più fina necessaria. L’avete d’altronde dettu ancu voi chi u cruciamentu di i dati era necessaria per ogni attori è perquessa ci si vole di più tempu à ognunu. Per esempiu ci vole andà in a nostra ricerca di dati sciffrati, al di là di e categurie dette A, B, C di u Pole emploi. Iss’altre categurie essendu quelle di e persone è piu in difficultà è e più alluntanate di l’impiegu , à e quale u Pole Emploi ùn prupone nisunu seguitu è nisuna azzione. I dati cuncernendu u RSA è L’allucazione d’infermità devenu esse dinò raccolti.
L’atelli territuriali ci ponu permette di sicuru d’avè un avvicinanza interessante di a realità di terrenu ma perquessa dinò, u tempu ci hà da mancà dà a raccolta à a sintesi culletiva necessaria. O sinò, emu a sbuccà nantu una simplice analisa quantitativa di i dati. Cum’ella hè stata dumandata da una altra cunsigliera ci vulerà di sicuru assucià l’agenzie è l’uffizii di a nostra assemblea ,cuncernati ch’elli sò, dà sta prublematica.
Listessu travagliu deve essa purtatu per ciò chi cuncerna l’insignamentu superiore, è qui, l’hà detta a cunsigliera esecutiva in carica d’issu cartulare , u travagliu hè maiò . L’università deve esse un partenariu attivu in st’assise, è perquessa dinò, ci si vole di più cuncertazione. Se a riflessione ùn si face micca in sinergia, chi si puderà pinsà di e suluzione pruposte ?
Per noi st’assise devenu sbuccà nantu à l’azzione chjare da permette di truvà l’equilibriu necessariu tra impiegu è furmazione pè u sviluppu ecunomicu di u nostru paese. Serà dinò u mumentu per noi di purtà rivindicazione à e quale no tenimu incù frà altru, cursizazione di l’impiegu, accessu pè tutti à un livellu di furmazione di qualità, postu di a nostra lingua in l’intraprese, inserzione di i ghjovani ch’elli sianu esciuti di i licei prufeziunali o di l’Università, furmazione à longu di a vita chi permette d’acquistà cumpetenze nove, accesu à l’impiegu pè quelli chi sò in difficultà maiò o infermi, megliurazione di e cundizione di travagliu in tutti i duminii, vultà di i ghjovani corsi chi sò stati furmati in altro è chi anu acquistatu cumpetenze chi ci abbisognanu da custruisce issu paese. Isse pruposte i vulemu dinù cunfruntà è spartele cù d’altri.
Allora, in u filu di u spiritu chi ci porta dapoi à u principiu d’issa mandattura, quellu d’una vulintà di truvà inseme e vie di a custruzzione di un prughjettu cumunu pè issu paese. Senza vulintà di rimessa in causa di u travagliu intrapresu sin’avà. Vi dumandemu di rivede, in accunsentu incu u Cumitatu di cundutta di st’assise, u calendariu previstu.
Eccu se vo l’acettate a pruposta che no vi femu :
– Prima tappa cunservendu l’archittetura di l’iniziu, sin’à u mese di ferraghju incu a tenuta di l’atelli previsti è una prima sintesa dopu a raccolta,
– Seconda tappa a partesi da u mese di ferraghju , vultà ver’di i prufeziunali incu prime misure pè una siconda cuncertazione è una ristituzione definitiva à u mese di lugliu. Sò solu 5 mese di più ma chi ci parenu esse di primura pè custruisce a nostra riflessione cume no l’avemu fattu pè l’assise di u fundariu è di l’alloghju chi si so tenute nantu à più di 9 mesi.
A sapete quantu à noi, chi nantu à issu sughjettu , ùn ci pudemu permette un fiascu chi serebbe un gattivu segnu mandatu à i Corsi. E quessa nimu qui, ùn lu vole, ne semu cunvintu.
Vi dumandemu dunque,di tene contu di e nostre pruposte chi si volenu aperte è a u serviziu di cio chi deve esse una riescita culletiva.
Corsica Libera
L’information Corse, Corsica Infurmazione
Vous aimez cet article ? Faîtes-en profiter vos amis !
Faites passer l’information autours de vous en cliquant sur :
Comments are closed.